Ujarassiorit 2016-imi ajugaasutut akissarsisussat toqqarneqarsimalerput.

Akissarsiassat siulliannik akileraaruteqanngitsunik 55.000 koruuninik aningaasartalimmik akissarsitinneqartoq tassaavoq Bendt Josefsen, Kapisillit. Bendt Josefsen-ip ajugaasutut toqqarneqarneranut peqqutigaa ujarak gnejs-eq sulfid-italik Kapisillit kujataanni nassaarisimasani. Ujarak taanna kanngussassamik akoqarluarpoq, akugalugit kanngussak 3,17 %, siilvi ujaqqamut tonsimut 10,1 gram kiisalu kobolt tonsimut 814 gram. Nassaami kanngussap koboltillu ataatsimut akuunerat soqutiginaateqarpoq, taamatullu saffiugassat taakku akooqatigiinnerat Nuup eqqaata ujaraani pisoqarsuusuni piffissami Arkæikum-imeersuni naliginnaanngilaq. Nunap sannaani nutaajunerusuni soorlu Afrikap qiterpasissuani kanngussaqarfimmi kanngussak koboltilu ataatsimut nassaassaapput.

Ajugaasut aappaat tassaavoq Frederikke Filemonsen, Aasiaat, toqqagaassutigalugu ujarak gnejs-eq molybæn-issamik akoqartoq Aasiaat kangianni Ujarattarfimmi nassaarisimasani.  Ujarak molybdæn-imik 0,43 %-imik rhenium-imillu tonsimut 0,73 gram-imik akoqarpoq. Aasiaat eqqaani molybdæn-eqarneranik ilisimasat annertunngillat. Molybdæn manngertumik sisaliornermi akugineqartarpoq. Rheniummilu saviminernut kissarnermut annertuumut akiuussinnaasunut akugineqartarpoq, soorlu timmisartut motooriisa atortuinut.

Ajugaasut pingajuisut toqqarneqartut marluk tamarmik immikkut koruuninik 10.000-inik akileraarutitaqanngitsunik akissarsisut: 

• William Umerineq, Kuummiut, Ikermi ujaqqamik killuutissamik sulfid-itaqarluartumik nassaartoq. Ujaqqap akoraa kobolt 0,33 %. Sumiiffiup ujarassiornikkut ilisimaneqarnera killeqarpoq, taamaattorli nassaap ilimanarsarpaa aatsitassarsiornikkut soqutiginaatilinnik aatsitassaqarsinnaasoq.

• Sofie Larsen, Qeqertaq, ujarak saviminissamik Ilulissat avannaani Anap Nunaaneersumik nassaartoq. Ujaqqak saviminermik 37,8%-imik akoqarpoq. Nassaarfiup eqqaani saviminissaqarfiit ilisimaneqarput, nassaarineqartumiilli pisoqaanerupput. Nassaap ilimanarsarpaa saviminissaqarfiit ilisimaneqartunit, soorlu Itilliarsummiit, nunap sananeqaataani nutaajunerusuni nassaarineqarsinnaasut

Ajugaasut sisamaat sisamat tamarmik immikkut 5.000 koruuninik akissarsisut: 

• Charlotte Hansen, Qasigiannguit, amfibolit-imik manngertornisumik nassaartoq. Ujaqqap akugaa kuulti tonsimut 0,25 gram. Ujarak qaarsumit  piigaavoq siornatigullu Qasigiannguani kuulteqarnera ilisimaneqanngilaq. Nassaalli tamanna ilimanarsarpaa.

• Hans Pape, Tasiilaq, ujaqqamik amfibolit-imik ilmenit-sitalimmik nassaartoq. Ilmenit titanium-imik saviminermillu akoqarpoq, Hans Papellu nassaava saviminermik 33,3 %-imik titan-iummimillu 10 % sinnerlugu akoqarpoq. Nassaarfiup nunaata sananeqaataa annikitsumik ilisimaneqarpoq, ilmenit-eqarneranilli periarfissaqarnera nassaarisap ilimanarsarpaa.

• Poul Alaufesen, Ikerasaarsuk, aligormik aappaluartumik (rosakvarts) pitsaasumik Innap qaavani Nassuttuup kujammut timaani nassaartoq. Aligoq aappaluartoq pinnersaasiarineqartarpoq, taamattaarlu kusassaatitut ”healing”-imullu ujaqqatut atorneqartarpoq. Aligoq aappaluartoq annikitsumik aatsitassarsiorluni akuersissuteqarluni aatsitassarsiortartut tunisassiassaattut piukkunnaateqarpoq.

• Bendt Egede, Illorsuit, Igalikup kangiani labradoritsimik pinnersaasiarineqarsinnaasutut pitsaassusilimmik nassaartoq. Labradorit pinnersaasiassaavoq iikkallu ujarattaatut atorneqarsinnaalluni. Nassaaq Ujarassiorimmut nassiunneqartoq silillugu pinnersaatitut ulamaartuliassatut piukkunnaateqarpoq.
  

Ajugaasunik toqqaasut tassaapput Aatsitassanik Ikummatissanullu Naalakkersuisoqarfimmi aamma Danmarkip Kalaallillu Nunaata ujarassiornermik Misissuisoqarfianiit ujarassiortut aatsitassalerinermik ilisimasaqartut. Ujarassiorit tassaavoq Kalaallit Nunaanni najugaqartunik ujarassiornermik soqutigisalinnik unammisitsineq. Allakkerivinni tamaniit akeqanngitsumik ujaqqanik Ujarassiorimmut misissugassanik nassitsisoqarsinnaavoq. Ujarassiorit pillugu annerusumik nittartakkami www.ujarassiorit.gl -imi misissuisoqarsinnaavoq.

Ujarassiorit Aatsitassanut Ikummatissanullu Naalakkersuisoqarfimmiit ingerlanneqarlunilu aningaasalersorneqarpoq. Ujarassiorimmi akissarsisut akissarsiassaat aningaasaateqarfinnit suliffeqarfinniillu ukuninnga aningaaliiffigineqarput:

GrønlandsBANKEN-ip Inuussutissarsiornermut Aningaasaateqarfia, FinnAust Mining Plc aamma Greenland Gas & Oil tamarmik immikkut akissarsiassanut 40.000 koruuninik aningaasaliipput.

Hudson Resources Inc. aamma North American Nickel Inc. tamarmik immikkut 10.000 koruuninik aningaasaliipput.

Aatsitassanut Ikummatissanullu Naalakkersuisoqarfiup aningaasaliisut qutsavigai, Ujarassiorip ingerlanneranut pingaaruteqarlutillu pinngitsoorneqarsinnaanngimmata.

 

 

Ujarassiorit – nuna tamakkerlugu ujarassiornermik soqutigisalinnut tamanut unammisitsineq – ukiormanna 2015-mut aallarteriivippoq. Ujarassiorit ukiut 27-it sinnerlugit ingerlanneqareerpoq.

Akissarsiassat akileraarutitaqanngitsut katillutik 120.000 kroniupput, taakkunanngalu ajugaasup 55.000 kr. pissarsiassarai.

Ujarassiorit Aatsitassanut Ikummatissanullu Naalakkersuisoqarfimmiit ingerlanneqarpoq aningaasalersorneqarlunilu. Eqquisut suliffeqarfinnit aningaasaateqarfinnillu ukunannga akissarsitinneqassapput:

GrønlandsBankip Inuussutissarsiutinut Aningaasaateqarfia aningaasaliisutut pingaarnertut 40.000 kroninik tapiivoq.

Hudson Resources Inc., Ironbark Limited aamma North American Nickel Inc. tamarmik immikkut 10.000 kr. kroninik tapiipput.

Internetikkut nittartakkami www.ujarassiorit.gl-imi ujarassiornermut peqataanermut paasissutissat saniasigut aamma downloaderneqarsinnaapput quppersakkat saqqummersitallu allat ujarassiornermi iluaqutaasinnaasut. Assersuutigiinnarlugu atuagaq ”Mineralinik-ilitsersuut – Ujarassiuujunngitsunut aatsitassarsiorneq” juulip qaammataani allakkerivinni tamani akeqanngitsumik pineqarsinnaalerumaarput.

Allakkerivimmissaaq pineqarsinnaapput unamminermi peqataasutut nassiussilernermi atugassat aammalu immersugassaq ateq, najukkap il.il. nalunaarsorneqarfissaat. Aamma nunap assinga pissarsiassaavoq, tassanilu nassaarfik nalunaarneqassaaq. Nassiussineq akeqanngilaq.

Ukiormanna Ujarassiorimmut peqataasut nassaavi tiguneqareersimassapput 1. oktober 2015 nallertinnagu.

Inuussutissarsiutiginagu ujarassiortut Kalaallit Nunaanni inuit allattorsimaffianni nalunaarsorsimasut kisimik peqataasinnaapput. Ujaqqat nunatsinneersut kisimik nassiunneqarsinnaapput. Ujaqqat nassaariffii sukumiisumik aatsaat nalunaarutigineqarpata peqataasut akissarsitinneqarsinnaapput. Karseeqqami ataatsimi nassiunneqartumi taamaallaat ujarak ataaseq nassiunneqassaaq, anginerpaamillu assammit eqeruloorsimasumit anginerussanngilaq, qaarsumiillu ujarak sapinngisamik peerneqarsimassalluni. Ujaqqat nassiussat utertinneqarsinnaanngillat.

Ujarassiorluarisi!

Ujarassiorit ujarassiornerlu pillugu sukumiinerusumik paasisaqarfigineqarsinnaavoq:

Ujarassiooq Jonas Petersen
Tlf.: +299 34 65 49
E-mail: Den här e-postadressen skyddas mot spambots. Du måste tillåta JavaScript för att se den. kiisalu Den här e-postadressen skyddas mot spambots. Du måste tillåta JavaScript för att se den.

Ujarassiooq Arent Heillman
Tlf.: +299 34 68 12
E-mail: Den här e-postadressen skyddas mot spambots. Du måste tillåta JavaScript för att se den. kiisalu Den här e-postadressen skyddas mot spambots. Du måste tillåta JavaScript för att se den.

Petra Bidstup Kullorsuarmiu ukioq manna Ujarassiorimmi akissarsiassat annersaannik 55.000 koruuninik akileraarutitaqanngisunik akissarsitinneqarpoq.

Nassaava tassaavoq ujarak aatsitassanik sulfid-inik sananeqaatilik Upernaviup avannaani Kullorsuup nunaqarfiata killingani nassaarisimasaa. Ujaqqamik misissuinerit paasinarsisippaat ujarak saffiugassamik zink-imik 1,1 procentimik akoqartoq. Tamanna nutaamik paasissutissiivoq Kullorsuup eqaaqqaani zink-imik akulinnik aatsitassaqarsinnaaneranut. Kitaata avannarpasissuani zink-imik akulinnik aatsitassaqarsinnaanera Namminersorlutik Oqartussanit GEUS-imiillu ataatsimut ingerlassatut misissorneqarpoq. Tamamma ukioq manna aasaanerani aallartippoq aappaagulu nagissalluni. Zink manngertornininnaveersaarnissamut innaallagissamullu batteriiliornermi igammik atorneqartarpoq.

Ajungaasut aappaat tassaavoq Peter Filemonsen Sisimiuneersoq akileraarutitaqanngitsunik 25.000 koruuninik akissarsitinneqartoq. Peter Filemonsen-ip nassaava tassaavoq ujarak sulfid-inik aatsitassartalik nikkelimik (0,2%-imik) aamma kobolt-imik saffiugassinillu platinimik assigisaanillu aamma akoqartoq. Ujarak taanna Sisimiut eqqaani nassaarineqarpoq, nassaallu takutippaa sumiiffimmi tassani eqqaanilu aatsitassanik taamak itsunik nassaassaqarsinnaasoq.

Ajungaasut pingajuattut akileraarutitaqanngitsunik immikkut tamarmik 10.000 koruuninik akissarsitinneqartut marluupput.

• Jonathan Davidsen, Qeqertarsuatsiaaniit. Ujarak akissarsissutaa tassaavoq amazonit qorsummik qalipaatilik, pinnersaasiassatut atorneqarsinnaasoq.

• Enok Skade, Ukkusissat. Ujaqqat akissarsissutaasut aligormik sananeqaateqartut platin-imik (tonsimut 0,2 gram-imik) aamma palladium (tonsimut 0,04 gram-imik) akoqarput.  

Ajungaasut sisamaattut akissarsitinneqartut sisamaapput tamarmik immikkut akileraatutitaqanngitsunik 5.000 koruuninik akissarsitinneqartut.

• Kristian Isaksen, Alluitsup paa. Ujarak nassaava qaarsumiit peerneqarluni misissugassanngortinneqartoq tonsimut 0,2 gram-imik kuultimik akoqarpoq. Nassaarfiuvoq Nanortaliup avannaani qeqertaq Ammalortoq.

• Godmann Filemonsen, Sisimiut. Ujarak Kangerlussuarmi Qatsissuarsummi nassaarineqartoq kanngussamik (0,5 %-imik) tonsimullu 0,4 %-imik palladium-imik akoqarpoq.

• Qaerngâq Nielsen, Savissivik. Savimminissaq sulfid-itaqarluartoq Savissiviup eqqaaneersoq savimminermik (21,4 %-imik) kanngussammillu (0,1 %-imik) akoqartoq.

• Iver Lyberth, Maniitsoq. Nassaarineqartoq ujaraavoq savimminissamik magnetit-imik akoqarluartoq savimminermik 50% sinnerlugu akoqartoq. Ujarak Isortumi Maniitsup kangiani nassaarineqarpoq.

Ujarassiorit tassaavoq Kalaallit Nunaanni najuqartunik ujarassiornermik soqutigisalinnik unammisitsineq. Allakkerivinni tamaniit akeqanngitsumik ujaqqanik Ujarassiorimmut misissugassanik nassitsisoqarsinnaavoq. Ujarassiorit pillugu annerusumik nittartakkami www.ujarassiorit.gl -imi misissuisoqarsinnaavoq.

Ujarassiorit Aatsitassanut Ikummatissanullu Naalakkersuisoqarfimmiit ingerlanneqarlunilu aningaasalersorneqarpoq. Ujarassiorimmi akissarsisut akissarsiassaat aningaasaateqarfinnit suliffeqarfinniillu ukuninnga aningaaliiffigineqarput:

GrønlandsBANKEN-ip Inuussutissarsiornermut Aningaasaateqarfia akissarsiassanut 40.000 koruuninik aningaasaliivoq.

Hudson Resources Inc., Ironbark Zinc Ltd. aamma North American Nickel Inc. tamarmik immikkut 10.000 koruuninik aningaasaliipput.

Annerusumik Ujarassiorit pillugu paasissutissat pissarsiarineqarsinnaapput saaffigalugu geologi Jonas Petersen på telefon +299 346549 imaluunniit e-mail Den här e-postadressen skyddas mot spambots. Du måste tillåta JavaScript för att se den.